දිවියේ අරමුණ?

ඔබ අවදිවන විට ඔබ කවදාවත් නොදැක්ක විශාල කර්මාන්ත ශාලාවක අවදිවුනා යැයි මදකට සිතන්න. දහස් ගණනක් මිනිසුන් එම කර්මාන්ත තුළ වැඩ කරමින් සිටන බව ඔබට දැකීමට හැකි වනු ඇත. මෙම කර්මාන්ත ශාලාවේ දොරජනෙල් සියල්ල වසා පිටත නොපෙනෙන අයුරින් අගුළු දමා තිබේ. මෙම කර්මාන්ත ශාලාව තුළ මිනිසුන් වැඩ කරනු ඇත, වෙහෙසට පත් වී නිදා ගනු ඇත, මේ අකාරයෙන් මෙම කර්මාන්ත ශාලාව තුළම තම කාලය ගත කරනු ඇත. මෙවන් දසුනක් දකින ඔබට කුමක් සිහියට ඒවිද? මම මෙම කර්මාන්ත ශාලාවේ මෙම මොහොතේ සිටින්නෙමි, අන් අය සමඟ එක් වී මාද වැඩ කළ යුතුය” යැයි ඔබට හැඟෙනු ඇත. නොඑසේනම්, “මම මෙම ස්ථානයට පැමිණයේ කෙසේද? මම මෙම කර්මාන්තශාලාව තුළට පැමිණයේ කුමන ස්ථානයේ සිටද? මෙම කර්මාන්තශාලාවට පිටතින් ඇත්තේ කුමක්ද? මම මෙම කර්මාන්තශාලාවේ සිටින්නේ කුමන අරමුණක් සඳහාද? මාගේ තේරීමක් නොමැතිවම මා මෙම ස්ථානයේ අවදි වූයේ කුමන හේතුව නිසාද?” යන ප්‍රශ්න ඔබගේ සිතේ හට ගත හැකිය. මෙම ප්‍රශ්න මිහිපිට ජීවත්වන මිනිසුන් වන අපගේ බිහිවීම සම්බන්ධව ඇති ප්‍රශ්නවලට සමාන වේ. එනම් මිනිසුන් වන අපි කිසිම තේරීමක් හෝ විකල්පයක් නොමැති අකාරයෙන් මෙම පෘථිවිය මත බිහිවී ඇත්තෙමු. මිනිසුන් වන අපට සම්භවයක් ඇති බව අපි දන්නෙමු. නමුත් “අප පැමිණියේ කුමන ස්ථානයේ සිටද? මම මෙම මිහිපිට කරන්නේ කුමක්ද? මාගේ දිවියේ අරමුණ කුමක්ද? මරණයෙන් පසු මට සිදු වන්නේ කුමක්ද? මරණයෙන් පසු මා යන්නේ කුමන ස්ථානයටද?” යනාදී ප්‍රශ්න රාශියක් ඔබගේ මනසේ හටගත හැකි ඉතා වැදගත් ප්‍රශ්න කිහිපයකි.

මානව ඉතිහාසය තුළ මෙම  ප්‍රශ්න තරම් මිනිසා විසින් නිරන්තරයෙන් පිළිතුරු සෙවීමට උත්සහ දැරූ වෙනත් ප්‍රශ්න නොමැති තරම්ය. මෙම ප්‍රශ්න මූලික හා හරවත් ප්‍රශ්න වූවත් නොයෙකුත් ලෞකික මායාවන් වලට බොහෝ මිනිසුන් නොදැනුවත්ව හෝ දැනුවත්ව වහල් වී සිටින බැවින් මිනිසුන් ලෞකික අරමුණු උදෙසා තම ජීවිතය ගත කිරීමට පුරුදු වී සිටින අතර මිනිසා පිළිතුරු සෙවිය යුතු ඉහත සඳහන් වැදගත් මෙවන් ප්‍රශ්න දෙස අවධානය යොමු කරන්නේ ඉතා කලාතුරකිනි. නමුත් මෙම ප්‍රශ්නවලින් පූර්ණ ලෙස මිදී යෑමට මිනිසාට හැකියාවක් නොමැත. එබැවින් ඉහත සඳහන් කළ සියලු ප්‍රශ්න වලට පිළිතුරු සෙවීම මිනිසාගේ පරම යුතුකමක් වන්නේ ය.

මෙම ප්‍රශ්න අතුරින් “මිනිස් දිවියේ අරමුණ කුමක්ද?” යන ප්‍රශ්නය සුවිශේෂී ස්ථානයක් හිමි කරගනියි. මිනිස් ජිවිතයේ මෙම සැබෑ අරමුණ කවරක්දැයි බොහෝ විට මිනිසා නොදනියි. ඔබ යම් කෙනෙකුගෙන් “ඔබගේ දිවියේ අරමුණ කුමක්ද?” යි විමසුවේ නම් බොහෝ විට ඔහු පවසන්නේ ලෞකික අරමුණක් ගැනය. නමුත් දිවියේ අරමුණ යැයි අදහස් වන්නේ මිනිසා විසින් ගොඩනඟා ගත් ලෞකික බලාපොරොත්තුවක් ගැන නොව මිනිසා මෙලොව ඉපදී මරණය තෙක් ගත කරන මිනිස් දිවියේ අරමුණ පිලිබඳවය. අහම්බෙන් සම්භවය වූ මිනිසා මරණින් පසු නිරුද්ධ වන බැවින් ජීවත් වන කෙටි කාලය තුළ තමන්ට හැකි පමණින් විනෝද වී මිය යා යුතු බව ඇතැමුන් පවසති. එනම් මොවුන් පවසුනුයේ මිනිස් දිවියට හරවත් අරමුණක් නොමැති බවයි. මිනිස් දිවියේ අරමුණ පිලිබඳ නිවැරදි අවබෝධයක් නොමැති තවත් පිරිසක් තම ජීවිතයේ මුහුණ දීමට සිදු වන දුක් කම් කටොළු නිසා ඇතැම් විට සිය දිවි පවා නසාගනිති. ඇත්තෙන්ම මිනිස් දිවියට හරවත් අරමුණක් නැද්ද?

මිනිසා විසින් නිමවන ලද ලොවේ පවතින ඕනෑම වස්තුවකට යම් හේතුවක් හෝ අරමුණක් හෝ ඇත. මිනිසා අල්ප මාත්‍රයක් පමණක් ගරු කරන ඇල්පනිත්තක නිර්මාණයටත් අරමුණක් ඇත. එසේ තිබියදී ඉතා සංකීර්ණ වූ මිනිසාගේ දිවිය සඳහාද යම් විශේෂ අරමුණක් තිබිය යුතුයි යන්න සිතීම සාධාරණය.

මේ අරමුණ කුමක්ද යන්න විග්‍රහ කිරීමට විවිධ චින්තකයන් උත්සහ දැරුවද මෙම අරමුණ මනා ලෙස දන්නේ මිනිසා නිර්මාණය කළ මිනිසාගේ නිර්මාපකයාය පමණි. මිනිසා නිර්මාණය කළ මෙවන් නිර්මාපකයෙක් සිටිනවාද යන්න කෙනෙකු සිතිය හැකිය. නමුත් මිනිසා ජීවත් වන අවට පරිසරය නිර්මාපකයෙකු සිටින බව සනාත කරයි. මිනිසා දෙස හා ඔහු ජීවත් වන විශ්වය දෙස විචාරශීලීව බැලීමේදී මෙම විශ්වය නිර්මාණය කළ ඉහළ බුද්ධියක්, නොඑසේනම් නිර්මාණකරුවෙකු සිටිනවා යැයි පිළිගැනීමට සිදු වේ. එසේ නම් මිනිස් දිවියේ අරමුණ මනා ලෙස දන්නේ මිනිසා නිර්මාණය කළ ඒ නිර්මාණකරුවා පමණි. මෙවන් නිර්මාණකරුවෙකු සැබවින්ම සිටිනවාද යන්න අප ස්ථීර ලෙස දැන ගත යුතුය. තවද එසේ සිටින්නේ නම් එම නිර්මාණකරුවා මිනිස් දිවියේ අරමුණ ගැන මිනිසාට කියා දීමට ගත් ක්‍රමවේදය කුමක්ද යන්නද අපි ගවේෂණය කළ යුතුවේ.

මෙම කරුණු ගවේෂණය කිරීමේදී පෙනී යන්නේ මිනිසා නිර්මාණය කළ නිර්මාණකරුවා විවිධ කාල වලදී විවිධ ප්‍රදේශ සඳහා මිනිසුන් අතුරින් කෙනෙකු පණිවුඩකරුවෙකු ලෙස තෝරාගෙන ඔහු හරහා මිනිසාට මෙම අරමුණ පැහැදිලි කර ඇති බවය. මෙලෙස පැමිණි දූතවරු මිනිසා මෙලොවේ ජීවත් වීමේ අරමුණ කවරක්දැයි තමන්ගේ ජන සමාජ වලට ප්‍රචාරය කළ හ.

මෙම දිවියේ අරමුණ නම් මිනිසාගේ නිර්මාපකයා නැමදීමයි. මෙහි අදහස හුදෙක් සිරස නැමීම නොව නිර්මාපකයාගේ අණට අනුව ක්‍රියා කිරීමයි. මෙලෙස ජීවත් වන්නාට මරණින් පසු සාර්ථක තවත් දිවියක් හිමි වන බව මෙම පණිවුඩකරුවන් ඔස්සේ මිනිසාගේ නිර්මාපකයා මිනිසාට කියා දී ඇත. දිවියේ අරමුණ කුමක්ද යන්න දන ගැනීම දිවිය සාර්ථක කර ගැනීමට උපකාර වනු ඇත. මෙයට හේතුව නිවැරදි දැක්මක් ඇති වීමය. දිවියේ අරමුණ කුමක්ද යන්න තේරුම් ගත් පුද්ගලයා එම අරමුණ ඉටු කර ගැනීම සඳහා මිනිස් දිවිය ගත කළ යුත්තේ කෙසේද යන්න පිළිබඳව අවධානය යොමු කර ඒ අනුව ජීවත් වෙති. මින් ජය ලබන්නේ ඔහුමය.

මිනිස් දිවියේ අරමුණ කුමක්ද යන්න දැන් ඔබ දන්නා විය හැකිය. නමුත් ඔබගේ සිතේ ඇතැම් සැකයන් තවමත් තිබෙනවා විය හැකිය. “ඇත්තෙන්ම මෙම පිළිතුර මා පිළිගත යුතුද? සියල්ල නිර්මාණය කළ නිර්මාපකයෙක් සැබවින්ම සිටිනවාද? එසේ පිළිගැනීමට ප්‍රබල හේතු තිබෙනවාද? මෙම නිර්මාපකයා විසින් තෝරා පත් කළ  පණිවුඩකරුවන් කවුරුන්ද? ඔවුන් ගෙන ආ පණිවුඩ සත්‍ය පණිවුඩද යන්න තීරණය කරන්නේ කෙසේද? එම පණිවුඩ අද වන තුරු ඒ අයුරින්ම ආරක්ෂා වී තිබෙනවාද?” යනාදී ප්‍රශ්න ඔබ තුළ තිබෙනවා වෙන්න පුළුවන්. මේ සැකයන් දුරු කර ගැනීමට “අරමුණ” වෙබ් අඩවිය ඔබට ප්‍රයෝජනවත් වනු නිසැක ය.

මරණය අත්වීමට පෙර ජීවිතය ගැන නැවත සිතා බැලීමට ඔබත් සූදානම්ද?

Comments are closed